युक्रेन, कीभ-युक्रेनका राष्ट्रपति भोलोदिमिर जेलेन्स्कीले रुसी राष्ट्रपति भ्लादिमिर पुटिनलाई वार्ताका लागि किभ आउन सार्वजनिक रूपमा निम्तो दिएका छन्। “यदि साहस छ भने किभ आउनुस्,” भन्दै जेलेन्स्कीले पुटिनलाई चुनौती दिएका हुन्।
शुक्रबार पत्रकारहरूसँग कुरा गर्दै जेलेन्स्कीले आफू कुनै पनि ढाँचाको वार्ताका लागि तयार रहेको बताए तर मस्को वा बेलारुस जान अस्वीकार गरे। रुसी पक्षबाट मस्कोमा वार्ताका लागि आएको निम्तोलाई अस्वीकार गर्दै उनले मस्कोमा पुटिनसँग भेट्नु किभमै भेट्नु जत्तिकै भएको टिप्पणी गरे।
रुस युक्रेनमाथि आक्रमण गरिरहेको आक्रामक राष्ट्र हो र बेलारुस यस कार्यमा साझेदार बनेको छ,” जेलेन्स्कीले भने।
यसअघि क्रेमलिनले युक्रेनी राष्ट्रपतिलाई फेरि मस्कोमा वार्ताका लागि निम्तो दिएको तर कुनै प्रतिक्रिया नआएको जनाएको थियो।
अबुधाबीमा वार्ता, अर्को चरण अनिश्चित
युक्रेन र रुसबीच गत साता संयुक्त राज्य अमेरिकाको मध्यस्थतामा अबुधाबीमा वार्ता भएको थियो। आइतबार अर्को चरणको वार्ता तय भए पनि अमेरिका–इरानबीचको परिस्थितिका कारण मिति र स्थान परिवर्तन हुन सक्ने जेलेन्स्कीले बताएका छन्।
“हामीले सहमति गरेका सबै पक्षहरू बैठकमा उपस्थित हुनु अत्यन्तै आवश्यक छ,” उनले भने।
ऊर्जा संरचनामा आक्रमण रोक्ने सहमति
अमेरिकी राष्ट्रपति डोनाल्ड ट्रम्पले अत्यधिक जाडोको अवस्थालाई ध्यानमा राख्दै एक साताका लागि युक्रेनको ऊर्जा संरचनामाथि आक्रमण नगर्न पुटिनले सहमति जनाएको बताएका छन्। क्रेमलिनका प्रवक्ता दिमित्री पेस्कोभले पनि पुटिनले उक्त अनुरोध स्वीकार गरेको पुष्टि गरेका छन्।
जेलेन्स्कीले सामाजिक सञ्जाल एक्स (X) मा ऊर्जा संरचनामाथिको आक्रमण रोक्ने विषयमा छलफल भएको र सहमति कार्यान्वयन हुने अपेक्षा व्यक्त गरेका छन्। “तनाव घटाउने कदमले युद्ध अन्त्यतर्फ वास्तविक प्रगति सम्भव बनाउँछ,” उनले लेखेका छन्।
अझै समाधान हुन बाँकी मुख्य विषयहरू
यद्यपि वार्तामा अझै पनि ठूला अवरोधहरू कायम छन्। रुसले युक्रेनी सेना डोनेत्स्क क्षेत्रको करिब एक-पाँचौँ भागबाट फिर्ता हुनुपर्ने माग राखेको छ। साथै, युद्धपछि युक्रेनमा अन्तर्राष्ट्रिय शान्ति सेना तैनाथ गर्ने विषय पनि विवादित बनेको छ।
