काठमाडौं–प्रधानमन्त्री सुशील कार्की ले आज सहिद दिवस को अवसरमा देशका सबै सहिद तथा जेनजी आन्दोलनका वीर योद्धाहरूप्रति हार्दिक श्रद्धाञ्जली व्यक्त गर्नुभएको छ। उहाँले भन्नुभयो, “नागरिक स्वतन्त्रता र लोकतन्त्रका लागि आफ्नो अमूल्य जीवन अर्पण गर्ने सबै सहिदहरूलाई हामी सदैव सम्झन्छौँ। न्याय, समानता, उत्तरदायी शासन र उज्यालो भविष्यको आशामा उठेको जेनजी आन्दोलनमा सहादत प्राप्त गर्ने वीर योद्धाहरूको साहस र समर्पणले नै आज हाम्रो देश परिवर्तनको ऐतिहासिक मोडमा उभिएको छ।”
प्रधानमन्त्री कार्कीले जोड दिनुभयो कि अब कुनै आमाको काख फेरि रित्तिन नपरोस् र शासकीय मूल्य, नैतिकता तथा नागरिकको सम्मानमा आधारित राज्य निर्माणको दायित्व प्रत्येक शासकको सधैं स्मरणमा रहोस्। उहाँले थप भन्नुभयो, “देश, जनता र जवाफदेही व्यवस्थाका निम्ति आफ्नो प्राणको आहुति दिनुभएका महान् योद्धाहरूप्रति हामी सधैं कृतज्ञ छौँ।”
प्रधानमन्त्रीको यो सन्देशले सहिदहरूको बलिदान सम्झँदै नागरिक अधिकार, लोकतन्त्र र जिम्मेवार शासनको महत्वलाई पुनः पुष्टि गरेको छ।
